Manjajokan Bika baulek bakuliliang kota: Servis untuak wisatawan

Hari itu Mak Sati talambek tibo di Palanta. Kutiko turun oto, tampak banyak kandaraan di halaman.
Dari ciri-ciri kandaraan, Mak Sati lah manakok sia tamu baliau.
Bana dugaan Mak Sati bahaso nan datang tu, iolah rombongan aktivis Ikatan Keluarga Agam dan Bukittinggi (IKAB) untuak mambicarokan masalah nan alun tuntas di dalam musyawarah hari Akaek tanggal 23 Juli 2006 nan lampau di Palembang.

"Assalamulaikum". Mak Sati mancogok di pintu.
Sarantak, sadonyo manjawab waalaikum "Wa alaikum salam".
Mak sati lansuang duduak baselo di pojok ruangan, tandonyo baliau siap mamimpin sidang palanta. "Silakan angku-angku manyampaikan masalah dan Usuik, tolong catat satu-persatu !".

Sutan Mudo lansuang maangkek tangan dan Mak Sati mampasilahkan.
"Ado duo topik nan kan ambo sampaikan. Partamo tantang istilah manggaleh jo badagang sarato saudagar, sabab istilah saudagar iko rasonyo indak cocok lai jo kondisi perkembangan peradaban maso kini dan istilah iko akan dipopulerkan baliak dek urang awak dalam kagiatan Temu Saudagar Minang. Kok jaman nabi memang kito akui saudagar nan mamegang peranan, tapi dunia masokini indak lai dibangun oleh saudagar, tapi oleh enterpreneur dengan para ahli atau pengusaha dengan urang pandai istilah awaknyo".

Dan nan ka duo barito tantang wali nagari Sulik Aia yang dituduah korupsi. Alah heboh dalam milis urang awak". "Nan partamo, awak sarahkan ka Mak Sati bulek-bulek untuak mampaluruih nan bengkok, mampadek nan gacua, manyisik nan kurang, iko karano baliau itu guru sastra dan bahasa. Tantang curito korupsi yang diikuti panculikan di nagari Sulik Aia alah dibahas dek SAS dan mereka mungkin akan manjalehkan kapado sidang palanta kito."

"Nan khusus kami bao kini iyolah, konsep wisata Bupati Agam nan beliau sampaikan patang Sabtu dan hari Akaek, lengkap jo tayangan CD. Iko paralu awak bahas sacaro manditil".
"Cukuik dulu !". "Sia lai ?"

"Silakan Kayo !"
"Tampaknyo antaro kami jo baliau sairiang indak sajalan, saarah balain adok, samandeh tapi balain bapak. Surek awak nan daulu, yang bajudul: Gilo mancaliak baruak barayun, indak saketek juo digubris dek bupati. Patuik awak kupas kondisi bupati ko. Tarimo kasih."
"Jadilah"...... Mak Sati mamotong pembicaraan.

"Tantang surek awak nan bajudul Gilo mancaliak Baruak barayun mungkin indak tabaco dek Bupati. Walaupun tulisan alah dimuek di internet,... bilo pulo baliau ka mambukak internet karano kasibukan."
"Urang nan mengklik internet tu kan samo karajonyo jo urang sadang mambaco surek kaba. Jadi kok lai baliau acok mambaco surek kaba nan tabik satiok pagi, tantu baliau rajin pulo mambukak internet nan bisa diakses setiap wakatu. Lagipulo baliau kan punyo staf nan bisa memcetakkan artikel-artikel atau kritik dari masyarakatnyo," salo Mantari Labiah.
"Stafnyo barangkali indak jeli sarupo si Usuik yang staf Palanta ko !"

"Ambo Mak Sati," salo Gindo Malano memotong pembicaraan.
"Masalah pariwisata ko bisa bak papatah awak juo, Salah garogok, ulu malang. Salah cotok malantiangkan. Gagabiya buliah bareknyo.
Supayo indak tajadi nan bak kian, sabalun bajak tasorong ka bancah, baringek iyo sabalun kanai, elok barimek sabalun abih. Sakian tarimo kasih"

"Sia lai?"
"Nan disampaikan tadi lah suaro kami basamo." tingkah Menan.
"Jadilah...... masalah pariwisata ko paralu kito bahas labiah dalam."
"Oleh karano itu dari ambo ado babarapo pandapek nan paralu kito diskusikan salanjuitnyo".
"Dek si Usuik alah mamasan nasi bungkuih, kito makan daulu. Sasudah makan, kito sambayang Luhua, sudah tu kito diskusi baliak. Baa,.... sadonyo siap, sidang diskors".

Salasai makan dan sumbayang luhua, anggota lah duduak di tampaik masiang-masiang.
Sidang dibuka baliak, Mak Sati malemparkan masalah kapado hadirin.
"Silakan harapan angku-angku mangenai wisata di Sumatera Barat......kampuangnyo urang Minang !"

"Kok sanyampang program wisata iko, tapaso ditarimo juo jo hati barek karano pamarentah pusek alah mainvestasikan bandara Minangkabau, ......mako ado babarapo sarat nan paralu dipikiakan. Pamikiran-pamikiran itu sarupo kasimpulan seminar-seminar palanta awak nan daulu. Pariwisata iko sifatnyo karajo manjua rupo (keindahan-kecantikan) sarato jo manjua 'servis nan prima' untuak malayani urang bapitih nan basanang-sanang. Pagawai hotel musti anak gadih jo bujang nan cigin-cigin tamasuak panari-panari, pamijit-pamijit nan ka manyambuik wisatawan. Wisatawan indak samo do jo tamu........hubuangan awak jo wisatawan sabateh manjua jo mambali sadangkan kapado tamu, agamo awak manyuruah untuak malayaninyo".

"Ambo mamotong panjalasan Mangkuto,...itu kan Mangkuto manilai segi negatif sajo nan disabuik. Mangkuto alah tamakan dek istilah 3 S. Ado pulo wisata nan bukan 3 S ...... yaitu wisata budaya jo wisata sejarah sarato wisata konvensi atau wisatawan nan bukan bule tapi wisatawan dari Arab yang Islam". Garegeh si Purun. Si Purun memang punyo pangalaman bajualan souvenir ketengan di kaki limo di muko museum Kairo tigo tahun nan lampau salapeh manjadi supir di Madinah. Di Kairo Purun maliek satiok ari ribuan wisatawan dari Eropa mengunjungi museum. Tapi dek indak punyo izin karajo, Purun di tangkok imigrasi, ditahan dan diusie ka lua Mesir.

"E e e, ....kok baitu pariwisata tamasuak barang dagangan kito pulo tu Mak Sati".
Si Usuik manyalo pandapaek Mangkuto: "Iyolah Suik,......Waang kan tau bahaso Urang Minang itu manganggap tabu atau sumbang bajualan 'kecantikan diri apolai manjua diri'. Kok nak bajualan 'sejarah melalui musium', awak alun punyo bukti sajarah nan bataraf internasional. Kok nak manyadiokan tampek seminar-seminar,....sia nan ka manjua ?".

Masih banyak barang dan jasa lainnyo nan bisa diproduksi dan dipadagangkan yang barasa dari kampuang. Urang Singapur nan indak punyo sawah, indak punyo taranak, apolagi punyo parak Kulik Manih jo parak Kalapo sameterpun dinagarinyo, kini manjadi saudagar besar untuak barang-barang nan diproduksi atau dipadagangkan malalui nagarinyo.

Lain halnyo kok urang nan datang ka tampek awak nak maliek-liek kalabiahan awak paralu ditarimo sabagai tamu, indak diojok-ojoki supayo urang mambayia untuak manonton rupo diri awak !
Kok jaman daulu biaso nan dijajokan di pasa-pasa iolah hasil bumi, sarupo gatah, tambakau, taranak dll. tapi indak pakai promosi-promosian mamakai CD media player tapi langsuang sajo ka pambali 'suko jual, suko beli' itulah akadnyo.

Kini barang-barang nan digalehkan alah batambah macamnyo, tamasuak manjua jasa guide, sewo penginapan-hotel, pertunjukan seni , jasa pijat-urut, jasa tontonan miss itu jo miss etan, tontonan KDI, dsb. Tamasuak pulo dipagalehkan sacaro malawan hukum iyolah narkoba. Karajo-karajo samacam iko alah diparingatkan oleh Tuhan dalam surat al Mukminun, baco ayat 3 dan 5.

"Tapi Mak Sati, ......bupati Agam katiko manjalehkan dasarnyo tampek kito nak dijadikan tujuan wisata unggulan iolah ...untuak maaliahkan wisatawan di Bali nan takuik dek bom...... sarato Jogya nan ditimpo gampo. Itu nan kito danga lansuang dari baliau. Jadi baliau nak mamindahkan sagalo model karajo wisata dari Bali jo Jogya itu ka tampek awak". kato Mangkuto

"Pandapek bupati tu paralu dibarasiahkan. Pandapek tu samo jo Uwia-uwia mintak gatah, sakian !"

"Ambo manambah". Mangkudun bapapatah. "Biduak disusun, manantang ombak, layia dipasang manantang angin".
"Nan lain silakan".
"Ambo nak manjalehkan mukasuik papatah kawan tadi". Jawek Leman.
"Silakan".
"Dek Bali dilapia bom dan Jogya diampai gampo sarato sunami di pantai selatan Jawa,..... bararti bupati Agam maajak bom jo gampo dan sunami datang ka tampek awak mancari bule maksiat,...... naauzubillah ! ......Katahuilah, bom dan gampo indak pandai mambedakan nan maa bule, nan maa pulo urang Minang. Sakian !"

"Kalau macam itu, awak paeloki caro bupati malatakkan dasar pariwisata. Carilah alasan nan lain, saumpamo untuak mancari pitih malalui pajak atau mampabanyak jumlah taksi malinteh di jalan".

"O..o..o. mampabanyak taksi malinteh di jalan sarupo nan ditayangkan televisi baru-baru ko. .......taksi plus mukasuik angku".
"...Bu..bu..bukan,.. bukan itu mukasuik ambo. Itu kan efek sampiangan dari kamajuan kampuang awak, nan indak melulu dihuni dek urang Minang sajo, tapi lah banyak pulo urang dari suku lain atau urang Sumbar nan indak basuku badiam di kota-kota, nan balain adat jo urang awak".
"Mareka itu lah mambali tanah-tanah pusako yang dipajuakan dek urang awak nan lah jatuah melarat di kampuang, indak barani marantau dan malupokan adat niniak muyangnyo".
"Aa pulo tu taksi plus; ambo indak manonton acara televisi itu".

"Di kota Padang kiniko ado taksi hilia mudiak malam hari manjajokan bika baulek bakaliliang kota mancari iduang balang...... iko karano di tampek awak indak ado lokalisasi sarupo kota-kota besar lainnyo di Indonesia".

Barangkali taksi model iko marupokan inovasi baru untuak maningkatkan servis kapado wisatawan. Mungkin inovasi iko cocok untuak merebut wisatawan dari Arab nan bagamis jo bajangguik panjang dan punyo dinar malimpah yang malu ka lokalisasi. Kok di Puncak mereka dibari servis jo kawin mut-'ah atau kawin kontrak. Layanan sarupo iko disadiokan dek pamilik hotel dan homestay di daerah itu, dan indak tatutuik kamungkinan ditiru pulo di kampuang awak sacaro diam-diam. Kabanyo di tampek awak alah ado pulo homestay eksklusif nan khusus untuak wisatawan dan urang kampuang indak buliah mandake i-nyo.
"Iko tanah ambo, rumah gadang pusako ambo... kini ambo jadikan homestay, dan pamarentah manyuruah ambo malayani wisatawan sebagai tamu di rumah sendiri". kato nan punyo.

Yang hadir tapurangah sadonyo....., takulai lunglai di tampek duduak masiang-masiang...mambayangkan output dari industri pariwisata yang dipromosikan besar-besaran itu oleh pemerintah kita, pamarentah kabupaten Agam.

Kayu di rimbo lah tandeh ditabang, gas jo minyak lah habih dilelang, ikan di lawik alah dicilok urang pulo karano pamarentah (pusat & daerah) awak indak pandai manggunokan kali-kali. Kini nan paliang gampang mancari pitih iolah mampromosikan jualan kacantikan diri atau manjua rupo dan manjadi palayan urang-urang kayo nan basanang-sanang datang diundang ka rumah awak, seketek labiah keren dari manjadi babu di rumah-rumah di Arab, di Hongkong.

Kok buliah kami punyo usulan,...... bialah si Buyuang Jibun punyo homestay di Bali, atau menginvest hotel di Pattaya dan si Purun manjua sovenir ketengan di depan museum Aztecs di Mexico City,... di sinan bantuak muko si Purun lai mirip jo panduduak pribumi...... kalau lah itu bana pilihan profesinyo di rantau urang. Indak manjadi promotor KDI di kampuang mandehnyo untuak mandatangkan turis, sahinggo nagari tajua, pusako tagadai ka investor. Lain daripado itu pitih untuak ka pambuek CD promosi yang dianggarkan dalam APBD tu bisa dialokasikan untuak mambali CD Encarta, Britanica dan CD pel komputer....... dibagikan dek nan Tuo-tuo ka sakolah-sakolah malatiah anak-kamanakan awak bakomputer dan palajaran bahaso Inggirih, .....iko akan jadi modal bagi mereka untuak marantau ka urban-urban di era globalisasi.....dengan demikian karajo pol PP bisa dikurangi.